٢٢ سنة

النهارده هكون كملت ٢٢ سنة علي هذا الكوكب ،،قررت اكتب ٢٢ حاجه اتعلمتهم وعرفتهم عن نفسي في ال ٢٢ سنة .

فلنبدأ .....

1- عرفت قيمة الأسئله واتعلمت ان اي سؤال يجي في دماغي لازم اسأله وان كل سؤال له اجابه ،مش شرط الاقيها ،بس هيا موجوده .

٢-اتعلمت ان احسن نسخه ممكن اكون عليها اني اكون نفسي -ونفسي فقط - .

3- اتعلمت ان مش شرط خالص اوصل لحاجات صح علي قد ما لازم اوصل لحاجات بتاعتي ،شبهي وابقي راضيه عنها .

4- I do care about people.
والناس بيهموني جدا بتهتم بيهم وبشفق عليهم دا مش غلط ومش ضعف ،انا تركيبتي كدا ،بس اتعلمت أ-handle الموضوع دا لان احيانا مردوده بيأثر علي سلامتي النفسية .

5-القراءة هي اهم حاجه اتعلمتها واكتر حاجه باتعلم منها

6- اتعلمت اخد كتاب معايا في اي مشوار بروحه

7- كل علاقة وكل حد بقابله بيعلمني حاجه

٨- بس مش لازم اقف عند كل حاجه بتحصلي واحاول احللها ،فيه مواقف بتحصل عشان نفوّتها

٩- اتعلمت ان في الوقت الي الاقي نفسي عاوزه اتكلم وانتصف لنفسي، هوا دا الوقت الي لازم اسكت فيه.

١٠-  اتعملت ان مش كل حاجه ينفع تتقال ،و مش اي حاجه ينفع تتقال لاي حد .

11- بس لسا معرفتش اعبر عن نفسي بالشكل الي يرضيني .

12 - الايمان شئ صعب جدا

13 -و شعور الامتنان هو اعظم شعور.

14- الانسان سبب مشاكله وهوا حلها .

15 - اتعلمت اخصص وقت لنفسي ،لازم يبقي فيه وقت بتاعي، اعمل فيه الي انا عاوزاه .

16-اتعلمت اقيم افكاري وانتقد نفسي وزي ما قال فيلسوفي المفضل جون بول سارتر " انا موهوب بالنقد الذاتي بشرط ألا يجبرني احد عليه "

17-اتعلمت ارفض اي حاجه مش عجباني

18-  وان الي عنده دم احسن من الي عنده عزبة  :D

19 -آمنت بأثر الفراشه واتعلمت اقدر الحاجات البسيطه الي بعملها او الي بتحصلي .

20 - كتر الشكوه لا بيقدم ولا بيأخر .

٢١- مينفعش اصدق اي حاجه بسمعها ،لازم اتأكد.

٢٢- واخيرا البسله بالبطاطس هي اكتر اكله بحبها في حياتي :D

وكل سنة ونُسخي في الأكوان الموازيه بخير وسلام

إنتهي .....