كتير أوي، بقرأ وبسمع من ناس كتير ومنهم ناس صحابي كلام عن الخوف من النسيان زي مثلا :-
-انا خايف اتنسي!
-انا خايفه اجي الدنيا وامشي ومحدش يعرفني!
-خايف ماسبش اثر و اموت زي الناس الي بيموتوا كل يوم و محدش بيسمع عنهم!
- خليك فاكرني -الاستاذ عمرو دياب-
و يعني فيه ناس بتقضي اعمارها تسافر و تشتغل وتصرف فلوس و تزاكر وتشقي وتتشقلب و حتي تساعد غيرها بس لمجرد انه ميتنساش, او حتي احيانا لاسباب متعلقه بالناس برده، عشان يكسبوا احترام/اعجاب الناس، او احيانا عشان يثبتوا لحد حاجه معينه ألخ.. بس موضوعي دلوقتي عن النسيان.
بس مكنتش بفهم -كالعاده يعني -
ليه الناس بتخاف انها تتنسي؟ ليه ممكن ممكن حد يفضل يجري طول حياته - بس- عشان خايف انه يتنسي، لمجرد الاحساس دا!
حاسه إن فيه سؤال اهم لازم يتسأل، هو انت خايف مين ينساك؟ هتقولي سؤالي بديهي يعني، خايف الناس تنساني!
طب خليني اقولك ماهما الناس دول نفسهم هيموتوا ومحدش هيفتكرهم!! يبقي عاوز مين يفتكرك؟ الفاني الي هو نفسه ٦٠ او ٧٠ سنه و هيروح في طي النسيان؟؟
حتي الموضوع ملوش مقياس محدد، ناس بنشوفهم مره واحده لمده لا تتعدي دقايق وبنفضل فاكرينهم طول حياتنا وناس معانا من سنين و ولا بيجوا في بالنا حتي وهما قاعدين جمبنا!
ماشي، حلو انك تحاول تعمل حاجه عظيمه و كل حاجه بس مش لمجرد انك تبقي عاوزه شويه تراب يفتكروك لما تبقي تراب زيه، لانه مش بأيدك ولا بأيد اي حد.
ولاقيتني بعيش نفس الخوف دا، بس استني كدا دا
انت ممكن تبقي بتكلم مع حد عادي و تاني يوم يدور ظهره وينساك كأن لم تكن .
فا لا،مش مستاهله.
مينفعش يكون دا خوفك،دا مغالاه في تقدير الناس.
الأطفال الي بيموتوا وهما لسا مخطوش برجليهم ولا خطوه في الارض.
الناس الي عاشوا وماتوا من اول ادم الي ان يرث الله الارض ومن عليها ومسمعناش عنهم ولا هنسمع.
و الي من مكاني دا دلوقتي فكراهم حتي وانا معرفهم وبشكرهم لانهم خلوني افكر تاني في قيمه الحياه و معناها.
محدش عرفهم و مكنوش عاوزين حد يعرفهم او يمكن كانوا عايشيين نفس الخوف دا، بس هل كدا نعتبرهم وجودهم مكنش له قيمه؟
لا، مظنش.
قبل ما تبقي خايف انك تتنسي لازم تفكر،خايف مين ينساك؟! هتلاقيها مش مستهله والله.
ها؟ لسا خايف تتنسي؟