انا شخصيتي مش بحب اكون وسط ناس كتير،بتوتر جدا ومش بلاقي راحتي ،ديما بكتفي، وبالنسبالي وجود صديقه واحده بس بتفهمني كويس او بتسمعني دا يغنيني عن كل الناس
ودا الي كنت بعمله ديما وبدور عليه، وجود حد واحد فعلا كافي جدا،-رغم ان الحد دا ديما كان بيبقي له شله مترتبط بيها- ديما، فببقي حاسه اني دخيله عليهم او وجودي وسطهم،مش لاني بنتمي ليهم،لا لاني بنتمي للشخص صاحبهم
بس وجهه نظري دي دلوقتي اتغير- او بمعني اصح اختلفت- مش كليا.
بس انا لست جوا التجربه وبتعلم، ومفيش دورس مستفاده اتعلمتها.
بس دا مؤذي او بقي مؤذي ليا.لعده اسباب..
أولها ان غياب الشخص دا من حياتي لأي سبب، كان بيسببلي اختلال وبيسيب مكانه فراغ، وبحس بوحده وحزن.
تاني حاجه ان بالنسبه للشله مثلا الي كنت مرتبطه بيها ولا حاجه لاني مش قريبه من حد منهم كان وحودي بس لان مع الشخص صاحبهم، ودا مكنش احساس لطيف خالص.
ثالثا، انت حاطط البيض كله ف سله واحده،ف بغيباه بتحتاج تملا مكانه بشخص او بشي، فكل مره يغيب اكنك بتدأ من اول وجديد.
منكرش ان -حتي الاحساس السئ بالوحده- الناتج عن غياب ناس بحبهم كان حافر كبير ليا اني اكتب او اعلم نفسي الرسم او ابدء اقيم افكاري فعلا واعرف مبادئي واحب قعدتي،او اطور نفسي -ولسا مستمره في التطوير دا* والنقطه دي من نقاط قوتي مش هنكر.
بس الاحساس السئ هيفضل احساس سئ،-مش هيفقد كونه كدا- حتي لو في يوم من الايام زقك عشان تعمل حاجه حلوه.
شكرا والله بس انا زهقت منه.
شادي عبد الحافظ قال ان "الخطأ ديما خطأك علي الاقل انك سمحت للشئ انه يحدث" انا كنت فاكره انه قاسي اوي ف كلمته دي،بس هو كلامه فيه شئ من الصح. ودا الي لاقيته ف كلام جان بول سارتر برده.
الوجوديه اه قاسيه وظاهريا تبان مذهب تشاؤمي،ولكن بتخليك تفوق لنفسك وتتحمل نتيجه اختيارتك -الصغير منها قبل الكبير - افعالك كمان.
عرفت الكلام دا وفهمته،
فا انا كدا بشكل ما مسؤله حتي عن كل حاجه بحسها، علي الاقل مسؤله عن رد فعلي تجاهها، انا كنت مفكره ان كوني مش برتاح وسط الناس الكتير دا عيب مني، ولكن دي شخصيتي، ولسا مش برتاح وسط الناس الكتير واحب تبقي عندي صديقه واحده صادقه احسن من عشره اي كلام، بس لسا حيرتي مخلصتش.
انا اه معنديش مشكله ابقي لواحدي،وبالعكس برتاح كدا، بس كمان لسا بحس بحزن شديد لما الشخص الي بحبه دا يمشي او يغيب عني ويمكن غصب عنه - ودا اصلا حال الدنيا- محدش فاضي لحد.
يمكن دا رساله جديده وانذار ليا من الحياه ،ان لازم اغير مسار واتعلم اواجه الناس وانغمس وسطهم -او علي الاقل- احاول يعني، حتي ولو بدرجه بسيطه. يمكن.
القصه لسا انا بكتبها، ومفيش دورس مستفاده او حاجه طلعت بيها لسا، معرفش المفروض اتصرف ازاي، بس اي حاجه هعملها هتبقي من اختياري، بكتب دا عشان احطه قدامي واقراه واملكه،
وبرده قدام عيني الجمله المرعبه لسارتر you have responsibility towards your destiny.
وعلي سياق منفصل، انا ممتنه جدا لمدونتي واني بستغل فرصه الكتابه عشان اعبر عن مشاعري وافكاري وانفعالاتي، يعني بس تخيل انك بتحكي قصتك الي انت لسا اصلا بتكتب فصولها، حاجه عظيمه جدا.
انتهي.
